నేడు, రేపు గ్రూప్-3 పరీక్షలు.. అరగంట ముందే మూతపడనున్న గేట్లు

తెలంగాణలోని వివిధ ప్రభుత్వ శాఖల్లో 1,365 గ్రూప్-3 సర్వీసుల పోస్టుల భర్తీకి సంబంధించి ఇవాళ, రేపు రాత పరీక్షలు జరగనున్నాయి. తెలంగాణ పబ్లిక్ సర్వీస్ కమిషన్  ఇందుకు ఏర్పాట్లు చేసింది. గ్రూప్-3 పరీక్షల కోసం రాష్ట్ర వ్యాప్తంగా 5.36లక్షల మంది అభ్యర్థులు దరఖాస్తు చేసుకున్నారు. వారు పరీక్షలు రాసేందుకు 1401 కేంద్రాలను టీజీపీఎస్సీ ఏర్పాటు చేసింది. పరీక్షా కేంద్రాల వద్ద పోలీసులు 144 సెక్షన్ విధించారు. గ్రూప్-3 పరీక్షల్లో భాగంగా ఇవాళ ఉదయం 10గంటల నుంచి మధ్యాహ్నం 12.30 గంటల వరకు పేపర్ -1, అదేవిధంగా మధ్యాహ్నం 3గంటల నుంచి సాయంత్రం 5.30 గంటల వరకు పేపర్ -2 పరీక్ష జరగనుంది. 18వ తేదీ ఉదయం 10గంటల నుంచి మధ్యాహ్నం 12.30 గంటల వరకు పేపర్-3 పరీక్ష నిర్వహించనున్నారు. అభ్యర్థులను పరీక్ష సమయం కంటే గంటన్నర ముందు నుంచే పరీక్షా కేంద్రాల్లోకి అనుమతిస్తారు. పరీక్ష ప్రారంభ సమయానికి అర్ధగంట ముందే పరీక్ష కేంద్రాల గేట్లు మూసివేయడం జరుగుతుందని, ఒక్క నిమిషం ఆలస్యమైనా అనుమతించమని టీజీపీఎస్సీ స్పష్టం చేసింది.