ఈరోజు హన్మకొండకు పవన్ కళ్యాణ్.. అంతా టెన్షన్!

ఆంధ్రప్రదేశ్ ఉప ముఖ్యమంత్రి, జనసేన పార్టీ అధినేత పవన్ కల్యాణ్ బుధవారం ఉదయం తెలంగాణలోని హనుమకొండ జిల్లాలో పర్యటించనున్నారు. ఈ పర్యటనలో భాగంగా ఆయన తీవ్ర అనారోగ్యంతో బాధపడుతున్న నిరంజన్ (17) అనే బాలుడిని ప్రత్యేకంగా కలుసుకోనున్నారు. తన అభిమాన హీరో అయిన పవన్ కల్యాణ్‌ను ఒక్కసారైనా కలవాలన్నది ఆ బాలుడి చిరకాల కోరిక కావడంతో, విషయం తెలుసుకున్న డిప్యూటీ సీఎం మానవత్వంతో ఈ నిర్ణయం తీసుకున్నారు.

పవన్ కల్యాణ్ నేరుగా బాలుడి నివాసానికి లేదా అతను చికిత్స పొందుతున్న ప్రదేశానికి చేరుకుని పరామర్శిస్తారు. బాలుడి ఆరోగ్య పరిస్థితిని అడిగి తెలుసుకోవడంతో పాటు, అతని కుటుంబ సభ్యులకు ధైర్యం చెప్పనున్నారు. తనను కలవాలనే అభిమాని కోరికను నెరవేరుస్తూనే, బాలుడికి అవసరమైన వైద్య సహాయం లేదా భవిష్యత్తు చికిత్సకు సంబంధించిన భరోసాను కూడా ఆయన అందించే అవకాశం ఉంది.

ఈ పరామర్శ అనంతరం డిప్యూటీ సీఎం పవన్ కల్యాణ్ హనుమకొండలోని ప్రసిద్ధ శ్రీ భద్రకాళి అమ్మవారి ఆలయానికి వెళ్లనున్నారు. అక్కడ అమ్మవారిని దర్శించుకుని, ప్రత్యేక పూజా కార్యక్రమాల్లో పాల్గొంటారు. పవన్ కల్యాణ్ హనుమకొండ పర్యటన నేపథ్యంలో స్థానికంగా ఉద్రిక్త వాతావరణం నెలకొంది. ఇటీవల తెలంగాణలో పవన్‌కు వ్యతిరేకంగా పెద్ద ఎత్తున పార్టీలు, తెలంగాణ వాదులు గళం వినిపించిన విషయం తెలిసిందే. దాంతో పోలీసులు పటిష్ట భద్రతా ఏర్పాట్లు చేశారు.