మహిళలను నోటికొచ్చినట్లు మాట్లాడితే ఎవరినీ వదిలిపెట్టేది లేదు : హోంమంత్రి అనిత

సోషల్ మీడియా పేరుతో మహిళలను నోటికొచ్చినట్లు మాట్లాడితే ఎవరినీ వదిలిపెట్టేది లేదంటూ హోంమంత్రి వంగలపూడి అనిత హెచ్చరించారు. ముఖ్యమంత్రి నారా చంద్రబాబునాయుడు, ఉపముఖ్యమంత్రి పవన్ కళ్యాణ్ ఆధ్వర్యంలో ప్రభుత్వం ప్రత్యేక చట్టం తీసుకొచ్చి దోషులను శిక్షించితీరుతామని ఆమె స్పష్టం చేశారు. పరదాలు కట్టుకుని ప్రజల్లోకి వచ్చినప్పుడు  ప్రజాస్వామ్యం ఖూనీ కాలేదా అంటూ మాజీ సీఎం వైఎస్ జగన్ మోహన్ రెడ్డిని హోంమంత్రి అనిత సూటిగా ప్రశ్నించారు. రాజకీయ ముసుగులో  వైసీపీ రౌడీలు, గూండాలు, సైకోలతో మహిళల పై నీఛాతినీఛంగా మాట్లాడించిన చరిత్ర జగన్ ది అంటూ విమర్శించారు. 

తన సొంత తల్లి, చెల్లిపైనా తప్పుడు రాతలు,పోస్టులు పెట్టినా  కనీసం పౌరుషం రాని వ్యక్తి జగన్ అన్నారు.  ఇప్పటికీ తన మనుషులే తన చెల్లెల్లైన షర్మిల, సునీతపైనా నీఛంగా మాట్లాడుతున్నా స్పందించలేదంటూ ఆమె మండిపడ్డారు. పార్టీలు, ప్రాంతాలు, కుల, మతాలకు అతీతంగా మహిళల గురించి పోస్టులు పెట్టి పైశాచిక ఆనందం పొందే వారిపై ఉక్కుపాదం మోపుతామని హోంమంత్రి అనతి స్పష్టం చేశారు.

తనపై పెట్టిన పోస్టులపై హోంమంత్రి అనిత భావోద్వేగం

ఏపీలో శాంతి భద్రతలు క్షీణించాయని, ప్రజాస్వామ్యం లేదని మొసలి కన్నీరు కార్చడం మానుకోవాలని హోంమంత్రి అనిత వైసీపీ అధినేత వైఎస్ జగన్ కు సూచించారు. ఐదేళ్ల పాలనలో జరిగిన విధ్వంసం, మహిళలపై జరిగిన దారుణాలు ప్రజలు మరిచిపోలేదన్నారు. గతంలో వైసీపీ ప్రభుత్వాన్ని ప్రశ్నించిన అనేక మందిపై కేసులు పెట్టారని ఆమె గుర్తు చేశారు. అమరావతి మహిళా రైతులపై నీచాతి నీచంగా మాట్లాడారని, కనకదుర్గమ్మ అమ్మవారి దర్శనానికి వెళ్తున్న వారిని పోలీసుల బూటుకాలుతో తన్నించినపుడు ప్రజాస్వామ్యం ఖూనీ కాలేదా అని ప్రశ్నించారు. రాజకీయాల ముసుగులో క్రిమినల్స్‌కు వైఎస్ జగన్ వంత పాడుతున్నారని ఆమె విమర్శించారు. 

ఈ సందర్భంగా గత వైసీపీ పాలనతో తనపై వైసీపీ మూకలు అసభ్యకర పోస్టింగులతో విరుచుకుపడిన తీరును తలచుకుని ఆమె భావోద్వేగానికి లోనయ్యారు. వైఎస్ జగన్ విధ్వంసక పాలనలో  గంజాయి, డ్రగ్స్ పెరిగిపోయి.. స్వాతంత్ర్య దినోత్సవం నాడే ఓ యువతిని  పొడిచిపొడిచి చంపిన ఘటనని ఆమె ప్రస్తావించారు. సోషల్ మీడియాలో అసభ్యకరంగా మాట్లాడినందుకు షర్మిళ ఫిర్యాదు చేసిన వర్రా రవీందర్ రెడ్డిని కూటమి ప్రభుత్వం  అరెస్ట్ చేస్తే వైఎస్ జగన్ కు ఎందుకంత జాలి కలిగిందో చెప్పాలన్నారు.

జగన్ హయాంలో కన్నా కూటమి ప్రభుత్వంలో క్రైమ్ 28శాతం తగ్గింది : హోం మంత్రి వంగలపూడి అనిత

ప్రజాస్వామ్యాన్ని ఖూనీ చేశారని జగన్ చెప్పడం విడ్డూరంగా ఉందని హోం మంత్రి వంగలపూడి అనిత వెల్లడించారు. గత ఐదేళ్లలో.. క్రైమ్ పెరిగిందనడానికి కేంద్ర ప్రభుత్వ గణాంకాలే నిదర్శనమన్నారు. నేరాలు ఘోరాలు పెరిగిన జగన్ పాలనలో ఏ నాడూ మాట్లాడని పులివెందుల ఎమ్మెల్యే.. ఈ రోజు ఏ అర్హత ఉందని మాట్లాడుతున్నారు? అన్నారు. వైఎస్ఆర్సీపీ ప్రభుత్వ హయాంలో ఎంతో మంది అమ్మాయిలు, చిన్నారులు బలైపోయారన్నారు. 

నేషనల్ క్రైమ్ రిపోర్టు ప్రకారం యువతులపై 8గంటలకో అత్యాచారం, మహిళలపై 2గంటలకో దాడి, చిన్నారులపై 10గంటలకో  అఘాయిత్యం జరిగిందన్నారు. అప్పుడు మాట్లాడకుండా.. అధికారం పోయేసరికి..జగన్ కు ఆడబిడ్డలు గుర్తొచ్చారా? అని నిలదీశారు. గత ఐదేళ్ల పాలనలో ఏపీ పరిస్థితి వెంటిలేటర్ పైకి వెళ్లిపోయిందని..దాన్ని మళ్లీ ఆక్సిజన్ ఇచ్చి, పరుగులు పెట్టించే దిశగా కూటమి ప్రభుత్వం ప్రయత్నాలను చూడలేకపోతున్నారని హోంమంత్రి విమర్శించారు.

ఘనమైన మీ ప్రభుత్వ గత చరిత్ర మరిచారా జగన్?: హోం మంత్రి

ఎంతో మందిని ప్రశ్నించినందుకు కేసులు పెట్టి వేధించిన వైసీపీ ప్రభుత్వం ఘనమైన గత నేరచరిత్రను మరిచిందా అంటూ హోంమంత్రి విమర్శించారు. ఎల్ జీ పరిశ్రమకు సంబంధించి స్పందించినందుకు 60 ఏళ్ల పైన వయసున్న మహిళ రంగనాయకమ్మకి అర్ధరాత్రులు నోటీసులిచ్చి ఎలా నరకం చూపించారో మరిచారా? అనడిగారు. రాజమండ్రికి చెందిన సంతోష్ వరదబాధితుల గురించి అడిగినందుకు గర్భవతి అయిన భార్యను హాస్పిటల్ కు తీసుకువెళుతుంటే మధ్యలోనే తీవ్రవాదిలా తీసుకుపోయినపుడు ఏం చేశారు? అని నిలదీశారు. 

గుడివాడకు చెందిన వైసీపీ నాయకుడు కొడాలినానిపై నిర్మల అనే మహిళ నిరసన తెలిపినందుకు అరెస్ట్ చేయలేదా? అంటూ ప్రశ్నించారు. గన్నవరం పార్టీ కార్యాలయంపై దాడి ఘటనలో కళ్యాణి అనే అమ్మాయిని 21 రోజులు జైళ్లో పెట్టినపుడు చీకటి రోజులు గుర్తు రాలేదా? అన్నారు. నా అక్కను వేధించొద్దన్నందుకు నడిరోడ్డుపై 14 ఏళ్ల  బాలుడిని కనికరం లేకుండా  అమర్ నాథ్ అనే బాలుడిని నిర్దాక్షిణ్యంగా పెట్రోల్ పోసి చంపేసినపుడు చీకటి రోజు కాదా? అంటూ సంధించారు. ఛలో ఆత్మకూరు అని టీడీపీ అధినేత చంద్రబాబు పిలుపునిస్తే ఇంటికొచ్చి తాళ్లు కట్టి అడ్డుకున్నది నిజం కాదా అన్నారు. 

అమరావతి సందర్శనకు వెళ్లిన చంద్రబాబును అడ్డుకోవాలని బస్సుపై రాళ్లు విసిరేలా చేసి, నాటి డీజీపీతో భావప్రకటన స్వేచ్ఛంటూ చెప్పించినపుడు ప్రజాస్వామ్యం ఖూనీ కాలేదా అన్నారు. బబ్బూరు వెంగలరావు, అమరావతి మహిళా రైతులు సహా లక్షల మందిని అవమానించిన తీరు , దురాగతాలు గుర్తు చేయమంటారా? అంటూ హోంమంత్రి మండిపడ్డారు. వైద్యులే నిర్ధారించినా సహానా సహా తిరుపతి, పుంగనూరు బాలికలపై అత్యాచారమంటూ దుష్ప్రచారం చేస్తున్న ఏ ఒక్కరినీ ఊరికే వదలబోమన్నారు. సోషల్ మీడియాలో ఒక పోస్టు షేర్ చేసినందుకు టీడీపీ నాయకులు  గౌతుశిరీష, 

చింతకాయల విజయ్ వంటి ఎందరినో వేధించిన వారిని  ఊరికే వదిలేయాలా అనడిగారు. జగన్  ప్రభుత్వ పాలనలో నేటి సీఎం, డిప్యూటీ సీఎం, ఎమ్మెల్యేలు, నేను, నా కుటుంబ సభ్యులు, టీడీపీ నాయకులంతా బాధితులేనన్నారు. ఫేక్ అకౌంట్ లతో ఎవరిమీదైనా ఏమైనా పోస్టులు పెడతామంటే సప్తసముద్రాలు దాటివచ్చి పట్టుకుని తీరతామని కచ్చితంగా వదలమని హోంమంత్రి తీవ్రంగా స్పందించారు.