మహిళల టీ20 ప్రపంచకప్లో భారత్ ప్రయాణం గ్రూప్ దశలోనే ముగిసింది. సెమీస్ చేరాలంటే తప్పక గెలవాల్సిన మ్యాచ్లో హర్మన్ప్రీత్ సేన 6 వికెట్ల తేడాతో ఆస్ట్రేలియా చేతిలో ఓటమి పాలైంది. గతేడాది వన్డే ప్రపంచకప్ గెలిచి అగ్రస్థానంలో నిలిచిన టీమిండియా, ఈ పొట్టి కప్లో కనీసం నాకౌట్ కూడా చేరకుండానే టోర్నీ నుంచి నిష్క్రమించడం అభిమానులను తీవ్ర నిరాశకు గురిచేసింది. టాస్ గెలిచి తొలుత బ్యాటింగ్ చేసిన భారత్ 4 వికెట్లకు 170 పరుగులు చేసింది. కెప్టెన్ హర్మన్ప్రీత్ సింగ్ (27 బంతుల్లో 56; 6 ఫోర్లు, 3 సిక్సర్లు) మెరుపు ఇన్నింగ్స్తో రాణించగా, షెఫాలి (34) ఫర్వాలేదనిపించింది. అయితే ఓపెనర్ స్మృతి మంధాన (37 బంతుల్లో 38), జెమీమా రోడ్రిగ్స్ (28 బంతుల్లో 34) మరీ నెమ్మదిగా ఆడడంతో భారత్ భారీ స్కోరు సాధించలేకపోయింది. ఆఖరి ఓవర్లో హర్మన్ప్రీత్ హ్యాట్రిక్ సిక్సర్లతో 23 పరుగులు రాబట్టడంతో స్కోరు 170కి చేరింది. లక్ష్య ఛేదనలో ఆసీస్ ఆరంభంలోనే వికెట్లు కోల్పోయి 12 ఓవర్లకు 85/3తో ఒత్తిడిలో పడింది. తెలుగమ్మాయి, లెఫ్టార్మ్ స్పిన్నర్ శ్రీ చరణి కీలకమైన లిచ్ఫీల్డ్ వికెట్ తీసి భారత్కు ఆశలు రేపింది. కానీ, ఇన్నింగ్స్ ద్వితీయార్ధంలో భారత బౌలర్లు, ఫీల్డర్లు చేతులెత్తేశారు. 'ప్లేయర్ ఆఫ్ ద మ్యాచ్' ఎలీస్ పెర్రీ (56), ఆష్లీ గార్డ్నర్ (53 నాటౌట్) ధాటిగా ఆడి మ్యాచ్ను ఆసీస్ వైపు తిప్పారు. రాధ యాదవ్, శ్రీ చరణి, రేణుక వేసిన ఓవర్లలో భారీగా పరుగులు సమర్పించుకోవడంతో ఆస్ట్రేలియా 19 ఓవర్లలోనే లక్ష్యాన్ని ఛేదించి సెమీస్కు దూసుకెళ్లింది. ఆసీస్తో పాటు సౌతాఫ్రికా గ్రూప్-1 నుండి ముందంజ వేయగా, భారత్ ఇంటిబాట పట్టింది.
![{[setting('site_name')]}](https://leaderworldnews.com/uploads/setting/1698755902915697269.webp)
