భార‌త్‌ను చూసి నేర్చుకోవాల్సిందే...ఇండియాపై ఎలాన్ మస్క్ ప్రశంసలు...

టెస్లా అధినేత, ప్రపంచ కుబేరుడు ఎలాన్ మస్క్ ఇండియాపై ప్రశంసల జల్లు కురిపించాడు. ఇటీవల అమెరికాలో జరిగిన ఎన్నికల్లో రిపబ్లికన్ పార్టీ అధ్యక్ష అభ్యర్థి డొనాల్డ్ ట్రంప్ విజయం సాధించడంలో మస్క్ కీలక భూమిక పోషించిన విషయం తెలిసిందే. ఈ క్రమంలో త్వరలో కొలువుదీరనున్న తన కేబినెట్ లో మస్క్ కు కీలక బాధ్యతలను ట్రంప్ అప్పగించారు. తాజాగా, ఎలాన్ మస్క్ ‘ఎక్స్’ వేదికగా భారత్ దేశం ఎన్నికల ప్రక్రియపై ప్రశంసలు కురిపించారు. అమెరికాలోని కాలిఫోర్నియాలో ఇంకా ఓట్ల లెక్కింపు ప్రక్రియ కొనసాగుతున్న వేళ ఓ నెటిజన్ ‘ఎక్స్’లో ఆసక్తికర పోస్టు చేశారు. భారతదేశంలో ఒక్కరోజులోనే 640 మిలియన్ల ఓట్లను ఎలా లెక్కించారు? అనే శీర్షికతో కూడిన ఓ వార్తాపత్రిక క్లిప్ ను సోషల్ మీడియాలో పోస్టు చేశాడు. ఎలాన్ మస్క్ ఆ పోస్టుకు స్పందించారు. ‘భారత దేశం ఒక్క రోజులోనే ఇన్ని ఓట్లను లెక్కించింది. కానీ, కాలిఫోర్నియా ఇంకా ఓట్ల లెక్కింపులోనే ఉంది’ అంటూ మస్క్ పేర్కొన్నాడు. ఈ క్రమంలో భారత్ లో ఎన్నికల ప్రక్రియ పై మస్క్ ప్రశంసల జల్లు కురిపించాడు.