ఇంగ్లాండ్ గడ్డపై టీమిండియా మళ్లీ ఫెయిల్.. చేజారిన టీ20 సిరీస్

ఇంగ్లాండ్‌తో జరిగిన నాలుగో టీ20 మ్యాచ్‌లోనూ టీమ్‌ఇండియా బ్యాటింగ్, బౌలింగ్ విభాగాల్లో ఘోరంగా విఫలమైంది. ఫలితంగా 9 వికెట్ల తేడాతో భారీ ఓటమిని మూటగట్టుకుంది. ఐర్లాండ్‌తో సిరీస్‌ను 0-2తో కోల్పోయిన భారత జట్టు, ఇప్పుడు ఇంగ్లాండ్‌తో ఐదు మ్యాచ్‌ల సిరీస్‌ను కూడా మరో మ్యాచ్ మిగిలి ఉండగానే 0-3తో ప్రత్యర్థికి సమర్పించుకుంది. ఆల్‌రౌండ్ ప్రదర్శనతో అదరగొట్టిన ఇంగ్లాండ్ జట్టు సిరీస్‌ను సొంతం చేసుకుని తన ఆధిపత్యాన్ని చాటుకుంది. టాస్ గెలిచి బ్యాటింగ్ ఎంచుకున్న భారత్‌కు టాప్ ఆర్డర్ తీవ్ర నిరాశ మిగిల్చింది. యువ ఓపెనర్ వైభవ్ సూర్యవంశీ (15), అభిషేక్ (16), ఇషాన్ కిషన్ (4) తక్కువ స్కోర్లకే వెనుదిరిగారు. 48 పరుగులకే 3 వికెట్లు కోల్పోయి కష్టాల్లో పడిన జట్టును కెప్టెన్ శ్రేయస్ అయ్యర్ (80 నాటౌట్; 49 బంతుల్లో) ఒంటరి పోరాటంతో ఆదుకున్నాడు. శివమ్ దూబె (22) నెమ్మదిగా ఆడటంతో పాటు తిలక్ వర్మ, వాషింగ్టన్ సుందర్ విఫలం కావడంతో నిర్ణీత ఓవర్లలో భారత్ 7 వికెట్ల నష్టానికి 158 పరుగులు మాత్రమే చేయగలిగింది. ఇంగ్లాండ్ బౌలర్లలో ఆర్చర్, టంగ్ రెండేసి వికెట్లతో భారత్‌ను దెబ్బతీశారు. 159 పరుగుల సాధారణ లక్ష్యంతో బరిలోకి దిగిన ఇంగ్లాండ్‌కు భారత బౌలర్లు ఏమాత్రం పోటీ ఇవ్వలేకపోయారు. ఇంగ్లాండ్ కెప్టెన్ బ్రూక్ (79 నాటౌట్; 35 బంతుల్లో), సాల్ట్ (59 నాటౌట్; 42 బంతుల్లో) భారత బౌలింగ్‌ను చీల్చిచెండారు. వీరిద్దరూ ఆకాశమే హద్దుగా చెలరేగడంతో ఇంగ్లాండ్ కేవలం 13.5 ఓవర్లలోనే ఒకే ఒక్క వికెట్ కోల్పోయి లక్ష్యాన్ని అలవోకగా ఛేదించింది.