అడివి శేష్ 'డెకాయిట్' మూవీ రివ్యూ.. సినిమా ఎలా ఉందంటే?

అడివి శేష్ తన గత చిత్రాల మాదిరిగానే ఈసారి కూడా ఒక వైవిధ్యమైన థ్రిల్లర్‌తో ప్రేక్షకుల ముందుకు వచ్చారు. హత్య కేసులో 13 ఏళ్లు జైలు శిక్ష అనుభవించి తప్పించుకున్న హరిదాస్ (అడివి శేష్), తనను జైలు పాలు చేసిన మాజీ ప్రేయసి సరస్వతి (మృణాల్)పై పగ తీర్చుకోవాలనుకుంటాడు. కానీ, ఆమె కష్టాల్లో ఉందని తెలిసి, ఆమెకు సాయం చేస్తూనే తన ప్రతీకారం తీర్చుకోవాలని ప్లాన్ చేస్తాడు. ఈ క్రమంలో వచ్చే ట్విస్ట్‌లు, పోలీసుల ఛేజింగ్‌లు, వీరిద్దరి మధ్య ఉండే సంఘర్షణ చుట్టూ కథ ఆసక్తికరంగా సాగుతుంది. సినిమా విశ్లేషణకు వస్తే, ప్రథమార్ధం చాలా వేగంగా, ఆసక్తికరమైన మలుపులతో సాగుతుంది. ముఖ్యంగా ఇంటర్వెల్ సీన్, యాక్షన్ సీక్వెన్స్‌లు, మదనపల్లి యాసలో అడివి శేష్ సంభాషణలు ప్రేక్షకులను కట్టుపడేస్తాయి. అయితే, శేష్ గత చిత్రాలతో పోలిస్తే ఈ కథలో కొత్తదనం కొంత తక్కువగా అనిపిస్తుంది. సెకండాఫ్‌లో కథనం కాస్త నెమ్మదించడం, క్లైమాక్స్ పాత సినిమాలను గుర్తుకు తెచ్చేలా ఉండటం బలహీనతలుగా మారాయి. మృణాల్ ఠాకూర్ తన నటనతో, కళ్లతో పండించిన భావోద్వేగాలు సినిమాకు పెద్ద ఎసెట్. సాంకేతికంగా సినిమా ఉన్నతంగా ఉంది. భీమ్స్ అందించిన పాటలు, నేపథ్య సంగీతం సినిమా మూడ్‌ను ఎలివేట్ చేయగా, నిర్మాణ విలువలు బాగున్నాయి. అనురాగ్ కశ్యప్, ప్రకాష్ రాజ్ వంటి నటులు తమ పాత్రలకు న్యాయం చేశారు. మొత్తానికి, 'డెకాయిట్' ఒక రెగ్యులర్ రివెంజ్ డ్రామా అయినప్పటికీ, అడివి శేష్ నటన, థ్రిల్లింగ్ యాక్షన్ ఎపిసోడ్స్ కోసం ఒకసారి చూడదగ్గ చిత్రంగా నిలుస్తుంది.