కార్తీక మాసాన మల్లన్నకు పెరిగిన హుండీ ఆదాయం..

అష్టాదశ శక్తి పీఠాల్లో, ద్వాదశ జ్యోతిర్లింగాలలో ప్రముఖ క్షేత్రం శ్రీశైలం. శ్రీ గిరిపై భ్రమరాంబ మల్లికార్జున స్వామిలుగా ఆది దంపతులు కొలువై భక్తులతో పూజలను అందుకుంటున్నారు. కార్తీక మాసం సందర్భంగా భక్తులు మల్లన్న ఆలయానికి పోటెత్తారు. అదే సమయంలో ఆలయ హుండీకి వివిధ దేశాల కరెన్సీలు వెల్లువెత్తాయి. వాటితో పాటు దేశీయ కరెన్సీ కూడా పెద్ద ఎత్తున రావడంతో మల్లన్న ఆదాయం పెరిగింది. మల్లన్న దేవస్థానానికి 4 కోట్ల 14 లక్షల 15 వేల 623 రూపాయల నగదు భక్తుల కానుకల ద్వారా లభించిందని దేవస్థానం అధికారులు తెలిపారు. పటిష్టమైన నిఘా నేత్రాల మధ్య హుండీ లెక్కింపు జరగగా లెక్కింపులో దేవస్థానం అన్ని విభాగాలకు చెందిన అధికారులు, సిబ్బంది, శివసేవకులు పాల్గొన్నారు.