సంక్రాంతి బరిలోకి మళ్లీ వెంకీమామ.. బాలయ్య, రామ్‌చరణ్‌తో పోటీ

2025 సంక్రాంతి సీజన్‌ను జనవరి 10న మెగాపవర్‌ స్టార్‌ రామ్ చరణ్ తన 'గేమ్‌ ఛేంజర్‌' సినిమాతో ఆరంభించబోతున్నారు. శంకర్ దర్శకత్వంలో రూపొందుతున్న ఆ సినిమాకు దిల్‌ రాజు నిర్మాత. చరణ్ వచ్చిన రెండు రోజుల తర్వాత అంటే జనవరి 12న బాలకృష్ణ తన డాకు మహారాజ్ సినిమాతో రాబోతున్నారు. బాబీ దర్శకత్వంలో రూపొందుతున్న ఈ సినిమా షూటింగ్‌ ముగింపు దశకు చేరుకుంది. జనవరి 14న వెంకటేష్ హీరోగా అనిల్‌ రావిపూడి దర్శకత్వంలో రూపొందుతున్న 'సంక్రాంతికి వస్తున్నాం' సినిమా విడుదల కాబోతుంది. టాలీవుడ్‌ నుంచి ప్రతి సంక్రాంతికి పెద్ద ఎత్తున సినిమాలు రిలీజ్ అవుతుంటాయి. 2024 సంక్రాంతికి మహేష్ బాబు 'గుంటూరు కారం', వెంకటేష్ హీరోగా నటించిన 'సైంధవ్‌', నాగార్జున హీరోగా నటించిన 'నా సామిరంగ', తేజ హీరోగా నటించిన 'హనుమాన్‌' సినిమాలు విడుదల అయ్యాయి. చిన్న సినిమాగా విడుదలైన హనుమాన్‌ సంచలన విజయాన్ని సొంతం చేసుకుంది. ఇతర సినిమాలకి మంచి స్కోప్‌ ఉన్నా ఫలితం తారుమారు కావడంతో వసూళ్లు అంతంత మాత్రంగానే నమోదు అయ్యాయి.