పల్స్ పోలియో కార్యక్రమంలో పాల్గొన్న ఇండియన్ పబ్లిక్ హెల్త్ అసోసియేషన్ ఆంధ్రప్రదేశ్ రాష్ట్ర శాఖ సభ్యులు

2026 జూన్ 28, ఆదివారం నిర్వహించిన పల్స్ పోలియో కార్యక్రమంలో ఇండియన్ పబ్లిక్ హెల్త్ అసోసియేషన్ (IPHA) ఆంధ్రప్రదేశ్ రాష్ట్ర శాఖ సభ్యులు పాల్గొని, పెద జాలారిపేట ప్రాంతంలో సుమారు 100 మంది చిన్నారులకు పోలియో చుక్కలు వేయించారు.
ఈ కార్యక్రమంలో ఇండియన్ పబ్లిక్ హెల్త్ అసోసియేషన్ ఆంధ్రప్రదేశ్ రాష్ట్ర శాఖ అధ్యక్షులు డా. ఎం.వి.వి. మురళీమోహన్, సంఘ సభ్యులు, జిల్లా వైద్య మరియు ఆరోగ్య శాఖకు చెందిన ఏఎన్‌ఎంలు (ANMs), ఆరోగ్య సిబ్బంది, అలాగే అంగన్‌వాడీ కేంద్రాల సిబ్బంది పాల్గొన్నారు.
ఈ సందర్భంగా జరిగిన సమావేశంలో డా. ఎం.వి.వి. మురళీమోహన్ మాట్లాడుతూ, “మన దేశం పోలియో వ్యాధిని విజయవంతంగా నిర్మూలించినప్పటికీ, మన పొరుగు దేశాల్లో ఇంకా పోలియో వైరస్ కొనసాగుతోంది. అందువల్ల పోలియో నిర్మూలన కోసం మన ప్రయత్నాలను నిరంతరం కొనసాగిస్తూ, ఎల్లప్పుడూ అప్రమత్తంగా ఉండాల్సిన అవసరం ఉంది” అని పేర్కొన్నారు.
అలాగే, ప్రతి చిన్నారికి పోలియో చుక్కలు అందేలా తల్లిదండ్రులు సహకరించాలని, పోలియో రహిత భారతదేశాన్ని కాపాడుకోవడం ప్రతి ఒక్కరి బాధ్యత అని ఆయన అన్నారు.
ఈ కార్యక్రమం ద్వారా పోలియో నిర్మూలన పట్ల ప్రజల్లో మరింత అవగాహన పెంపొందించేందుకు కృషి చేసిన అన్ని వర్గాల సిబ్బందిని ఆయన అభినందించారు.