విశాఖలో ఇక మెట్రో రయ్.. రయ్.. మూడు లైన్లు ప్లాన్

విశాఖపట్నం మెట్రో రైలు ప్రాజెక్టుకు సంబంధించి ఎంతో కాలంగా ఎదురుచూస్తున్న ముందడుగు పడింది. ఈ ప్రాజెక్టు సమగ్ర నివేదికకు (DPR) కేంద్ర ప్రభుత్వం ప్రాథమికంగా పచ్చజెండా ఊపడంతో, గతంలో నిలిచిపోయిన టెండర్ల ప్రక్రియను పునఃప్రారంభించేందుకు మార్గం సుగమమైంది. విశాఖతో పాటు విజయవాడ మెట్రో ప్రతిపాదనలకు కూడా కదలిక రావడంతో రాష్ట్రవ్యాప్తంగా మెట్రో రైలు కల త్వరలోనే సాకారం కాబోతోంది. విశాఖలో తొలిదశలో మొత్తం 46.23 కిలోమీటర్ల మేర మూడు ప్రధాన కారిడార్లను ప్రతిపాదించారు. స్టీల్‌ ప్లాంట్‌ నుంచి కొమ్మాది వరకు సుదీర్ఘమైన మొదటి కారిడార్‌ ఉండగా, గురుద్వారా నుంచి పాత పోస్టాఫీసు వరకు రెండోది, తాటిచెట్లపాలెం నుంచి చినవాల్తేరు వరకు మూడో కారిడార్‌ను ఏర్పాటు చేయనున్నారు. ఈ ప్రతిష్టాత్మక ప్రాజెక్టు తొలిదశ నిర్మాణానికి సుమారు రూ. 11,498 కోట్ల వ్యయం అవుతుందని అధికారులు అంచనా వేశారు. కేంద్ర మెట్రో రైలు పాలసీ-2017 ప్రకారం, ఈ ప్రాజెక్టు వ్యయంలో 20 శాతం నిధులను కేంద్రం, మరో 20 శాతం నిధులను రాష్ట్ర ప్రభుత్వం సమకూర్చనున్నాయి. మిగిలిన 60 శాతం నిధులను ఏడీబీ, ప్రపంచ బ్యాంకు వంటి అంతర్జాతీయ సంస్థల నుంచి సాఫ్ట్‌ లోన్ల రూపంలో సేకరిస్తారు. ఈ రుణానికి కేంద్రం హామీ ఇవ్వగా, రాష్ట్ర ప్రభుత్వం 30 ఏళ్లలోపు దీనిని తిరిగి చెల్లించాల్సి ఉంటుంది. కేంద్రం నుంచి పూర్తిస్థాయి స్పష్టత వచ్చిన వెంటనే విశాఖ నగరంలో పనులు వేగవంతం కానున్నాయి.