రజనీకాంత్ వేట్టయాన్ రికార్డుల మోత మిక్స్‌డ్ టాక్‌‌తోనూ జోరు

దసరా సందర్భంగా థియేటర్లలోకి వచ్చిన సూపర్ స్టార్ రజినీకాంత్ నటించిన తాజా చిత్రం వేట్టయాన్ బాక్సాఫీస్ వద్ద వసూళ్లలో దూసుకెళ్తోంది. టీజే జ్ఞానవేల్ డైరెక్షన్‌లో వచ్చిన ఈ చిత్రం ఈనెల 10న ప్రపంచవ్యాప్తంగా విడుదల కాగా.. తొలిరోజే మిక్స్‌డ్‌ టాక్‌ను సొంతం చేసుకుంది. అయినప్పటికీ విడుదలైన నాలుగు రోజుల్లోనే రికార్డ్ స్థాయి వసూళ్లు సాధించింది.ప్రపంచవ్యాప్తంగా ఇప్పటికే రూ.240 కోట్ల గ్రాస్ వసూలు చేసింది. అదేవిధంగా రూ.104.75 కోట్ల నెట్ కలెక్షన్స్ రాబట్టింది. దీంతో రజినీ కెరీర్‌లో రూ.200 కోట్ల క్లబ్‌లో చేరిన ఏడో చిత్రంగా వేట్టయాన్ నిలిచింది. అంతకుముందు తలైవా చిత్రాలైన పెట్టా, దర్బార్, ఎంథిరన్‌, కబాలి, జైలర్‌, రోబో 2.0 చిత్రాలు రూ.200 కోట్ల క్లబ్‌లో చేరాయి.ఈ ఏడాదిలో రజినీకాంత్ నటించిన జైలర్ మూవీ బాక్సాఫీస్ వద్ద రూ.605 కోట్లు వసూళ్లు రాబట్టింది. ఇదో జోరు కొనసాగితే మరికొద్ది రోజుల్లోనే పెట్టాను వేట్టయాన్ అధిగమించనుంది. ఈ చిత్రంలో అమితాబ్ బచ్చన్, టాలీవుడ్ హీరో రానా కూడా నటించారు.