ఫిఫా కప్ విజేతగా స్పెయిన్.. రూ.420 కోట్ల ప్రైజ్‌మనీ

న్యూజెర్సీ వేదికగా జరిగిన ఫిఫా ప్రపంచకప్-2026 ఫైనల్ పోరులో అర్జెంటీనాపై 1-0 తేడాతో విజయం సాధించి స్పెయిన్ విశ్వవిజేతగా అవతరించింది. ఉత్కంఠభరితంగా సాగిన ఈ మ్యాచ్‌లో నిర్ణీత 90 నిమిషాల సమయం ముగిసేసరికి ఇరు జట్లు ఎలాంటి గోల్స్ చేయలేకపోయాయి. దీంతో ఫలితం కోసం కేటాయించిన 30 నిమిషాల ఎక్స్‌ట్రా టైమ్‌లో, 106వ నిమిషంలో స్పెయిన్ స్టార్ ప్లేయర్ ఫెర్రాన్ టోర్రెస్ అద్భుతమైన గోల్ చేసి జట్టుకు చారిత్రాత్మక విజయాన్ని అందించాడు. ఈ విజయంతో 2010 తర్వాత స్పానిష్ జట్టు రెండోసారి ప్రతిష్టాత్మక ప్రపంచకప్ ట్రోఫీని ముద్దాడింది. ఫిఫా విజేతగా నిలిచిన స్పెయిన్ జట్టుపై కాసుల వర్షం కురిసింది. ట్రోఫీతో పాటు దాదాపు 50 మిలియన్ డాలర్లు అంటే.. భారత్ కరెన్సీలో సుమారు రూ.420 కోట్ల నగదు బహుమతిని స్పానిష్ జట్టు సొంతం చేసుకుంది. రన్నరప్‌గా నిలిచిన అర్జెంటీనా జట్టుకు సుమారు రూ.277 కోట్ల ప్రైజ్ మనీ లభించింది. ఈ మెగా టోర్నమెంట్‌లో మూడో స్థానాన్ని కైవసం చేసుకున్న ఇంగ్లండ్ జట్టుకు దాదాపు రూ. 243 కోట్లు నగదు బహుమతి దక్కగా, నాలుగో స్థానంతో సరిపెట్టుకున్న ఫ్రాన్స్ జట్టు సుమారు రూ. 225 కోట్లు ప్రైజ్ మనీని పట్టుకెళ్లింది.