బాక్సాఫీస్‌ వద్ద ‘పెద్ది’ ప్రభంజనం.. వారం రోజుల్లోనే రూ.345 కోట్లు!

మెగా పవర్‌ స్టార్ రామ్ చరణ్ హీరోగా, ప్రముఖ దర్శకుడు బుచ్చిబాబు సానా కాంబినేషన్‌లో వచ్చిన రూరల్ స్పోర్ట్స్ డ్రామా ‘పెద్ది’ థియేటర్లలో విజయవంతంగా దూసుకెళ్తోంది. శ్రీకాకుళం నేపథ్యంలో తెరకెక్కిన ఈ భారీ చిత్రానికి మొదటి రోజు నుంచే ప్రేక్షకుల నుంచి మంచి స్పందన లభిస్తోంది. దాంతో ఈ సినిమా ఓపెనింగ్ రోజే ఏకంగా రూ.135 కోట్లకు పైగా గ్రాస్ వసూళ్లు సాధించి బాక్సాఫీస్ వద్ద సరికొత్త రికార్డు సృష్టించింది. తాజాగా ఈ చిత్రం విడుదలై వారం రోజులు పూర్తి చేసుకుంది. కేవలం ఏడు రోజుల్లోనే ప్రపంచవ్యాప్తంగా రూ.345 కోట్లకు పైగా వసూళ్లు రాబట్టినట్లు చిత్ర నిర్మాతలు అధికారికంగా ప్రకటించారు. థియేటర్లలో సినిమాకు వస్తున్న క్రేజ్, నిలకడైన వసూళ్లను చూస్తుంటే.. రాబోయే కొద్ది రోజుల్లోనే ఈ చిత్రం చాలా సులభంగా రూ.400 కోట్ల క్లబ్‌లో చేరే అవకాశం స్పష్టంగా కనిపిస్తోంది. ఈ చిత్రంలో రామ్ చరణ్ సరసన బాలీవుడ్ బ్యూటీ జాన్వీ కపూర్ హీరోయిన్‌గా నటించి మెప్పించింది. మైత్రీ మూవీ మేకర్స్ సుకుమార్ రైటింగ్స్‌తో కలిసి నిర్మించిన ఈ ప్రతిష్టాత్మక చిత్రంలో కన్నడ స్టార్ శివరాజ్‌కుమార్, జగపతి బాబు, బోమన్ ఇరానీ వంటి నటులు కీలక పాత్రలు పోషించారు.