భారత ఆల్ రౌండర్ హార్దిక్ పాండ్య టీ20 క్రికెట్ లో అరుదైన రికార్డును సాధించాడు. ఆస్ట్రేలియాలో భారత్ జట్టు హల్ చల్ చేస్తుంటే మరోవైపు ఐపీఎల్ 2025 మెగా వేలానికి ముందు ఇతర టీమిండియా ఆటగాళ్లు దేశవాళీ టీ20 క్రికెట్ లో రాణిస్తున్నారు. సయ్యద్ ముస్తాక్ అలీ ట్రోపీ ఇందుకు వేదికైంది. ఈ టోర్నీలో తొలిరోజే తిలక్ వర్మ, శ్రేయాస్ అయ్యర్ సహా ఆరుగురు బ్యాటర్లు సెంచరీల మోత మోగించారు. ఈ క్రమంలో హార్దిక్ పాండ్యా సైతం తన సత్తాను చాటాడు. 35 బంతుల్లో 74 పరుగులు చేసి నాటౌట్ గా నిలిచాడు. ఈ టోర్నీలో బరోడా జట్టు తరపున హార్దిక్ పాండ్యా ఆడుతున్నాడు. ఈ క్రమంలో అరుదైన రికార్డును నమోదు చేశాడు. ఐదో స్థానంలో బ్యాటింగ్ వచ్చిన పాండ్యా మెరుపు ఇన్నింగ్స్ ఆడి జట్టును విజయతీరాలకు చేర్చాడు. హార్దిక్ ఇన్నింగ్స్ లో ఆరు ఫోర్లు, ఐదు సిక్సులు ఉన్నాయి. ఈ క్రమంలో టీ20 క్రికెట్ లో 5వేల పరుగులు, 100 వికెట్లు పడగొట్టిన తొలి భారత క్రికెటర్ గా పాండ్యా రికార్డుల్లోకెక్కాడు.
![{[setting('site_name')]}](https://leaderworldnews.com/uploads/setting/1698755902915697269.webp)
