బంగారం ధర భారీగా పడిపోయే సంకేతం.. తులం రూ.1 లక్షకే!

బంగారం ధరలు భారీగా తగ్గే అవకాశం ఉందన్న నిపుణుల అంచనాలు పసిడి ప్రియుల్లో ఆశలు రేకెత్తిస్తున్నాయి. ప్రస్తుతం 10 గ్రాముల మేలిమి బంగారం ధర సుమారు రూ.1.59 లక్షల వద్ద ఉండగా, భవిష్యత్తులో ఇది రూ.లక్ష లోపునకు పడిపోయే అవకాశం ఉందని విశ్లేషకులు భావిస్తున్నారు. రష్యా-ఉక్రెయిన్ యుద్ధం కారణంగా నెలకొన్న అంతర్జాతీయ అనిశ్చితి వల్ల పెట్టుబడిదారులు బంగారాన్ని సురక్షితమైన మార్గంగా ఎంచుకోవడంతో ధరలు గత ఏడాది కాలంలో 70 శాతానికి పైగా పెరిగాయి. అయితే, అమెరికా అధ్యక్షుడిగా బాధ్యతలు చేపట్టిన ట్రంప్, వచ్చే జూన్ నాటికి ఈ యుద్ధాన్ని ముగించి శాంతిని నెలకొల్పడమే లక్ష్యంగా అడుగులు వేస్తున్నారు. రష్యాపై ఆర్థిక ఒత్తిడి పెంచడం, సుంకాలు విధించడం వంటి చర్యల వల్ల రష్యా కూడా మెత్తబడుతున్న సూచనలు కనిపిస్తున్నాయి. ముఖ్యంగా, అంతర్జాతీయ వాణిజ్య సెటిల్‌మెంట్లను తిరిగి అమెరికా డాలర్లలో నిర్వహించేందుకు రష్యా సిద్ధమవుతున్నట్లు తెలుస్తోంది. అదే గనుక జరిగితే, డాలర్‌కు మళ్ళీ పూర్వ వైభవం వచ్చి, ప్రపంచవ్యాప్తంగా పెట్టుబడులు బంగారం నుండి డాలర్ వైపు మళ్లుతాయి. ఫలితంగా కేంద్ర బ్యాంకులు బంగారం కొనుగోళ్లను నిలిపివేసే అవకాశం ఉందని, అప్పుడు పసిడి ధరలు భారీగా దిగజారి సామాన్యులకు అందుబాటులోకి వస్తాయని విశ్లేషకులు వివరిస్తున్నారు.