దేశంలో ప్రైవేటు వ్యక్తుల చేతుల్లోకి 11 విమానాశ్రయాలు.. పీపీపీ ముసుగు

దేశంలో రెండో విడత విమానాశ్రయాల ప్రైవేటీకరణ ప్రతిపాదనకు పబ్లిక్ ప్రైవేట్ పార్ట్‌నర్‌షిప్ అప్రైజల్ కమిటీ  ప్రాథమిక ఆమోదం తెలిపింది. ఈ ప్రాజెక్ట్ కింద 11 విమానాశ్రయాలను 5 భాగాలుగా విభజించి, ఒక్కో భాగాన్ని 50 సంవత్సరాల కాంట్రాక్ట్ వ్యవధి కోసం ఒకే ప్రైవేట్ సంస్థకు అప్పగించనున్నారు. వీటిలో అమృత్‌సర్, వారణాసి, భువనేశ్వర్, రాయ్‌పూర్, తిరుచిరాపల్లి వంటి పెద్ద ఎయిర్‌పోర్టులతో పాటు తిరుపతి, గయా, హుబ్బళ్లి, ఔరంగాబాద్ వంటి చిన్న ఎయిర్‌పోర్టులు ఉన్నాయి. చిన్న ఎయిర్‌పోర్టుల ఆర్థిక స్థిరత్వాన్ని పెంచేందుకు లాభదాయకమైన పెద్ద విమానాశ్రయాలతో కలిపి వీటిని 'బండిల్' రూపంలో వేలం వేయాలని ఎయిర్‌పోర్ట్స్ అథారిటీ ఆఫ్ ఇండియా నిర్ణయించింది. మార్కెట్‌పై ఒకే సంస్థ ఆధిపత్యం లేదా ఆర్థిక ప్రమాదాలు పెరగకుండా నిరోధించేందుకు, ఒక్కో బిడ్డర్‌కు ఎన్ని బండిళ్లు దక్కవచ్చనే దానిపై గరిష్ఠ పరిమితి విధించనున్నారు. దేశీయ ప్రయాణికుల సంఖ్యపై చెల్లించే ఫీజు ఆధారంగా విజేతలను ఎంపిక చేస్తారు. ఈ ప్రైవేటీకరణ ఒప్పందంలో భాగంగా ప్రైవేట్ ఆపరేటర్లు విమానాశ్రయ నిర్వహణ, అభివృద్ధి బాధ్యతలను తీసుకుంటారు. కాగా, ఎయిర్ ట్రాఫిక్ కంట్రోల్, కమ్యూనికేషన్ సేవల బాధ్యతలు మాత్రం ఎయిర్‌పోర్ట్స్ అథారిటీ ఆఫ్ ఇండియా వద్దే ఉంటాయి. ప్రైవేటీకరణ సమయంలో ఎంబార్కింగ్ ఉద్యోగులకు ఏడాది పాటు ఉమ్మడి నిర్వహణ వ్యవధిని, ఆ తర్వాత కనీసం 60 శాతం మంది ఉద్యోగులను 3 ఏళ్ల వరకు ప్రైవేట్ సంస్థలు కొనసాగించేలా చర్యలు చేపట్టనున్నారు.