నీట్ పేపర్ లీక్‌ బాధ్యులపై మోదీ సీరియస్.. ఈరోజు కేబినెట్‌లో చర్చ

నీట్ పేపర్ లీకేజీ వ్యవహారంపై ప్రధాని నరేంద్ర మోదీ సోషల్ మీడియా వేదికగా ఒక కీలకమైన వీడియో సందేశాన్ని విడుదల చేశారు. పేపర్ లీకేజీలు లక్షలాది మంది విద్యార్థులు, వారి తల్లిదండ్రుల జీవితాల్లో ఎంతో ఆవేదనను నింపాయని, దీనిని కేంద్ర ప్రభుత్వం చాలా తీవ్రమైన అంశంగా పరిగణిస్తోందని ఆయన స్పష్టం చేశారు.

యువత భవిష్యత్తుతో ఆడుకునే వారిపై ప్రభుత్వం కఠిన వైఖరితో వ్యవహరిస్తుందని హామీ ఇచ్చారు.  ఈ సమస్య పరిష్కారానికి ఫాస్ట్ ట్రాక్ కోర్టులు ఏర్పాటు చేయడంతో పాటు నిందితులకు కఠినమైన శిక్షలు పడేలా సరికొత్త ముసాయిదా బిల్లును సిద్ధం చేసినట్లు ప్రధాని వెల్లడించారు.

అధికారులతో చర్చించిన అనంతరం రాత్రి వేళలోనే దీనికి సంబంధించిన నివేదిక తనకు అందిందని, దీనిపై కేంద్ర క్యాబినెట్ సమావేశంలో విస్తృతంగా చర్చించి చట్ట రూపం ఇస్తామని చెప్పారు. రాబోయే పార్లమెంట్ సమావేశాల్లోనే ఈ బిల్లును ఉభయ సభల్లో ఆమోదింపజేసేందుకు శాయశక్తులా కృషి చేస్తామని తెలిపారు.  

ఇప్పటికే లీకేజీలకు బాధ్యులైన వారిని అరెస్టు చేసి జైలుకు పంపడమే కాకుండా, దాదాపు 22 లక్షల మంది విద్యార్థుల విద్యా సంవత్సరం వృథా కాకుండా త్వరితగతిన తిరిగి పరీక్షలు నిర్వహించామని మోదీ పేర్కొన్నారు. కేవలం అరెస్టులతో సరిపెట్టుకోకుండా, భవిష్యత్తులో ఎవరూ ఇలాంటి చర్యలకు పాల్పడకుండా ఉండేలా బలమైన చట్టపరమైన వ్యవస్థను తీసుకురావడమే తమ ప్రభుత్వ ప్రధాన ఉద్దేశమని ఆయన పునరుద్ఘాటించారు.