శ్రీవారి మెట్ల మార్గంలో మళ్లీ చిరుత.. చెట్టుపై దర్జాగా కూర్చుని దర్శనం

తిరుమల శ్రీవారిమెట్టు నడక మార్గంలో చిరుతపులి సంచారం తీవ్ర కలకలం రేపింది. శేషాచల అటవీ ప్రాంతం నుంచి బయటకు వచ్చిన చిరుత, మార్గాన్ని దాటి సరస్వతీ మండపం సమీపంలో సంచరిస్తుండటాన్ని కాలినడకన వెళ్తున్న భక్తులు గుర్తించారు. చిరుతను చూసిన వెంటనే వారు తీవ్ర భయాందోళనకు గురై, వెంటనే అప్రమత్తమై విజిలెన్స్‌ అధికారులకు సమాచారం అందించారు. సమాచారం అందుకున్న విజిలెన్స్‌ సిబ్బంది హుటాహుటిన సంఘటనా స్థలానికి చేరుకుని పరిస్థితిని పరిశీలించారు. ఆ సమయంలో చిరుత సమీపంలోని ఒక చెట్టు కొమ్మపై కూర్చుని ఉండటాన్ని వారు గుర్తించారు. వెంటనే సిబ్బంది పెద్దగా శబ్దాలు చేస్తూ దానిని బెదిరించడంతో, చిరుత అక్కడి నుంచి అడవిలోకి పారిపోయింది. అధికారుల సకాల స్పందనతో పెద్ద ప్రమాదం తప్పడంతో భక్తులు ఊపిరి పీల్చుకున్నారు. ఈ ఘటన నేపథ్యంలో భద్రతా సిబ్బంది నడక మార్గంలో ప్రయాణించే పాదచారులను, భక్తులను అప్రమత్తం చేశారు. అటవీ జంతువుల సంచారం ఉన్నందున, భక్తులు ఎవరూ ఒంటరిగా వెళ్లకుండా గుంపులుగా మాత్రమే నడక మార్గంలో ప్రయాణించాలని అధికారులు సూచించారు. అటవీ ప్రాంతం కావడంతో భక్తులు అప్రమత్తంగా ఉండాలని, ఎటువంటి ప్రమాదాలు జరగకుండా తగిన జాగ్రత్తలు తీసుకోవాలని విజిలెన్స్ అధికారులు హెచ్చరికలు జారీ చేశారు.