కేతన్‌ కేసులో ఊహించని ట్విస్ట్.. హత్యకి ముందే పెళ్లిచేసుకున్న సియా

మహారాష్ట్రలోని పుణెలో ప్రముఖ వ్యాపారవేత్త కేతన్‌ అగర్వాల్‌ హత్య కేసులో రోజుకో కొత్త ట్విస్ట్‌ వెలుగులోకి వస్తోంది. కేతన్‌తో నిశ్చితార్థం జరిగిన తర్వాత, నిందితురాలు సియా గోయల్‌ తన ప్రియుడు చేతన్‌ చౌధరిని రహస్యంగా వివాహం చేసుకున్నట్లు పోలీసుల విచారణలో తేలింది. సుమారు నాలుగు నెలల కిందట జరిగిన వీరి రిజిస్టరు పెళ్లికి సియా కళాశాల స్నేహితులు ఇద్దరు సాక్షులుగా సంతకాలు చేసినట్లు సమాచారం. నిజానికి కేతన్‌ అగర్వాల్‌తో సియాకు ఈ ఏడాది ఫిబ్రవరిలో ఘనంగా నిశ్చితార్థం జరిగింది. వీరిద్దరికీ నవంబరులో వివాహం జరిపించేందుకు ఇరు కుటుంబాల పెద్దలు నిశ్చయించారు. అయితే కేతన్‌తో పెళ్లి ఇష్టం లేని సియా.. నిశ్చితార్థం ముగిసిన కొద్ది రోజులకే పుణెలోని స్థానిక రిజిస్ట్రార్‌ ఆఫీసులో ప్రియుడు చేతన్‌ను పెళ్లాడింది. ఆ తర్వాత ప్రియుడితో కలిసి పథకం ప్రకారం కేతన్‌ను దారుణంగా హత్య చేసింది. ఈ నేపథ్యంలో ప్రత్యేక వివాహ చట్టం కింద సియా, చేతన్‌లకు అధికారికంగా వివాహ ధ్రువీకరణ పత్రం జారీ అయ్యిందా.. లేదా అనే కోణంలో పోలీసు వర్గాలు ప్రస్తుతం తనిఖీలు చేస్తున్నాయి. ఈ రహస్య వివాహానికి సాక్షులుగా ఉన్న ఆమె స్నేహితులను కూడా పోలీసులు విచారిస్తున్నారు.