కోచ్ సాబ్ ఇప్పుడైనా కాస్త నవ్వు.. గంభీర్‌పై ధోనీ సెటైర్!

టీమ్‌ఇండియా టీ20 ప్రపంచకప్‌ విజయం క్రికెట్ అభిమానుల్లో కొత్త ఉత్సాహాన్ని నింపడమే కాకుండా, భారత క్రికెట్ ఇద్దరు దిగ్గజాల మధ్య ఉన్న అనుబంధాన్ని మరోసారి చాటిచెప్పింది. దాదాపు రెండేళ్ల విరామం తర్వాత మహేంద్ర సింగ్ ధోని సోషల్ మీడియాలో పోస్ట్ చేస్తూ, అహ్మదాబాద్‌లో చరిత్ర సృష్టించిన భారత జట్టును, సహాయ సిబ్బందిని మనసారా అభినందించారు. ముఖ్యంగా కోచ్ గౌతమ్ గంభీర్‌ను ఉద్దేశించి "కోచ్ సాబ్.. మీరు నవ్వితే బాగుంటారు" అని ధోని సరదాగా వ్యాఖ్యానించడం విశేషం. దీనికి స్పందనగా గంభీర్ కూడా "నవ్వడానికి ఇప్పుడు సరైన కారణం దొరికింది, నిన్ను చూడటం సంతోషంగా ఉంది" అని బదులివ్వడం సోషల్ మీడియాలో వైరల్‌గా మారింది. గతంలో వీరిద్దరి మధ్య 'కోల్డ్ వార్' నడుస్తోందంటూ సోషల్ మీడియాలోను, క్రీడా సర్కిల్స్‌లోను పెద్ద ఎత్తున చర్చలు జరిగేవి. ముఖ్యంగా 2011 ప్రపంచకప్ ఫైనల్ క్రెడిట్ విషయంలోనూ, మైదానంలో నిర్ణయాల విషయంలోనూ గంభీర్ చేసే వ్యాఖ్యలు వీరి మధ్య విబేధాలు ఉన్నాయనే వార్తలకు ఊతమిచ్చాయి. అయితే, తాజా సంభాషణతో ఆ వార్తలన్నీ కేవలం ప్రచారమేనని, దేశం కోసం ఆడే విషయంలో వీరిద్దరి ఆలోచనా దృక్పథం ఒక్కటేనని మరోసారి స్పష్టమైంది. ఆటగాళ్ల మధ్య వైరం కంటే దేశ విజయం పట్ల ఉండే గౌరవమే గొప్పదని ఈ దిగ్గజాలు నిరూపించారు. ఆదివారం అహ్మదాబాద్ స్టేడియంలో ధోని స్వయంగా హాజరై మ్యాచ్‌ను వీక్షించడం అభిమానులను అలరించింది. టీమిండియా అద్భుత ప్రదర్శనపై ధోని ప్రశంసలు కురిపిస్తూనే, బుమ్రా అద్భుతమైన స్పెల్ గురించి ప్రత్యేకంగా ప్రస్తావించనవసరం లేదని (అతని ప్రదర్శన అంత గొప్పగా ఉందని అర్థం) పేర్కొన్నారు.