రాజ్యసభ ఎంపీ రేసులోకి నాగబాబు.. నందమూరి ఫ్యామిలీ నుంచి ఒకరు?

జనసేన పార్టీ నేత, మెగా బ్రదర్ నాగబాబుకు పదవిపై ఆసక్తికర చర్చ జరుగుతోంది.. ఆయన ఢిల్లీకి వెళతారనే ప్రచారం నడుస్తోంది. ఈ మేరకు డిప్యూటీ సీఎం పవన్ కళ్యాణ్ కసరత్తు చేస్తున్నట్లు తెలుస్తోంది. ఏపీలో మూడు రాజ్యసభ స్థానాలకు సంబంధించిన ఎన్నికలకు షెడ్యూల్ విడుదలైంది. ఈ క్రమంలో ఆ మూడు ఎంపీ పదవులు ఎవరికి దక్కుతాయనే చర్చ నడుస్తోంది. ఈ మూడు పదవుల్లో నాగబాబుకు ఒక పదవి ఇస్తారనే ప్రచారం జరుగుతోంది. రాజ్యసభలో జనసేన పార్టీకి ప్రాతినిధ్యం లేదు.. అందుకే పవన్ కళ్యాణ్ ఒక రాజ్యసభ పదవి కోరుతున్నట్లు ప్రచారం మొదలైంది. ఈ మేరకు ఢిల్లీలో కేంద్ర పెద్దల దగ్గర ప్రస్తావించారనే ఊహాగానాలు వినిపిస్తున్నాయి. టీడీపీ రెండు, జనసేన ఒక పదవి తీసుకుంటుందా అనేది ఆసక్తికరంగా మారింది. అంతేకాదు టీడీపీకి రెండు.. బీజేపీకి ఒక పదవి ఇస్తారనే మరో ప్రచారం కూడా ఉంది. టీడీపీ నుంచి కూడా ఎంపీ రేసులో కంభంపాటి రామ్మోహన్‌రావు, బీదా మస్తాన్‌‌రావు, గల్లా జయదేవ్, సానా సతీష్ పేర్లు వినిపిస్తున్నాయి. అంతేకాదు నందమూరి సుహాసినికి అవకాశం ఇస్తారనే మరో ప్రచారం కూడా జరుగుతోంది.