వైజాగ్‌ టు విజయవాడ గంటన్నరలోనే.. గంటకు 320 కి.మీ వేగంతో ట్రైన్!

విశాఖపట్నం-విజయవాడ మధ్య ప్రయాణ సమయాన్ని తగ్గించేలా గంటకు 320 కి.మీ వేగంతో దూసుకెళ్లే బుల్లెట్ రైలు (హైస్పీడ్ రైల్ కారిడార్) ప్రాజెక్టుపై రైల్వే శాఖ ముందడుగు వేసింది. సుమారు 350 కిలోమీటర్ల పొడవైన ఈ కారిడార్‌ను ఏలూరు, రాజమహేంద్రవరం, కాకినాడ వంటి ముఖ్య పట్టణాలను అనుసంధానిస్తూ నిర్మించే ప్రతిపాదనను అధికారులు పరిశీలిస్తున్నారు. ఇందుకోసం 'ఫైనల్ లొకేషన్ సర్వే' నిర్వహించేందుకు అనుమతి కోరుతూ రైల్వే బోర్డుకు ప్రతిపాదనలు పంపారు. ఈ హైస్పీడ్ కారిడార్ అందుబాటులోకి వస్తే విశాఖపట్నం నుంచి విజయవాడకు కేవలం గంటన్నర నుంచి రెండు గంటల్లోనే చేరుకునే అవకాశం కలుగుతుంది. అంతేకాకుండా, దీనిని అమరావతి మీదుగా వెళ్లే హైదరాబాద్-చెన్నై బుల్లెట్ రైలు కారిడార్‌తో అనుసంధానించడం ద్వారా విశాఖ వాసులకు హైదరాబాద్, బెంగళూరు, చెన్నై వంటి మెట్రో నగరాలకు అత్యంత వేగవంతమైన రవాణా సౌకర్యం లభిస్తుంది. ఇది నగర పారిశ్రామిక, పర్యాటక రంగాల అభివృద్ధికి ఊతమివ్వనుంది. బుల్లెట్ రైలుతో పాటు విజయవాడ-కర్నూలు మధ్య సెమీ హైస్పీడ్ కారిడార్‌ను కూడా నిర్మించేందుకు రైల్వే శాఖ ప్రణాళికలు సిద్ధం చేస్తోంది. ఇప్పటికే విశాఖపట్నం రైల్వే స్టేషన్‌ను ఐకానిక్ స్టేషన్‌గా తీర్చిదిద్దుతున్న తరుణంలో, ఈ కొత్త హైస్పీడ్ రైలు ప్రాజెక్టులు కూడా తోడైతే విశాఖపట్నం దక్షిణాదిలోనే కీలకమైన లాజిస్టిక్, ఎకనామిక్ హబ్‌గా మారనుంది. రైల్వే బోర్డు నుంచి క్లియరెన్స్ రాగానే ఈ దిశగా పనులు వేగవంతం కానున్నాయి.