ఆస్ట్రేలియా టూర్‌కి భారత్ జట్టు ఎంపిక వైజాగ్ కుర్రాడికి ఛాన్స్

ఆస్ట్రేలియా గడ్డపై జరగనున్న బోర్డర్‌ గవాస్కర్‌ ట్రోఫీ కోసం బీసీసీఐ భారత జట్లను ప్రకటించింది. ఈ మేరకు శుక్రవారం రాత్రి ప్రకటన విడుదల చేసింది. వచ్చే నెల 22 నుంచి ఆస్ట్రేలియాతో ఐదు మ్యాచ్‌ల టెస్టు సిరీస్‌ ప్రారంభం కానుంది. ఇందుకోసం ఏకంగా 18 మంది సభ్యులతో కూడిన జట్టును బీసీసీఐ సెలక్షన్‌ కమిటీ ఎంపిక చేసింది. టెస్టు జట్టుకు కెప్టెన్‌గా రోహిత్ శర్మ, వైస్‌ కెప్టెన్‌గా జస్‌ప్రీత్‌ బుమ్రాలను ఎంపిక చేసింది.టెస్టు జట్టులో చోటు కోసం ఎదురుచూస్తున్న శ్రేయస్‌ అయ్యర్‌, ఇషాన్ కిషన్‌లకు మరోసారి నిరాశే ఎదురైంది. వారిద్దరికీ జట్టులో చోటు దక్కలేదు. ఇదే సమయంలో గాయం నుంచి ఇంకా పూర్తిగా కోలుకోని షమీని సైతం పక్కనపెట్టింది బీసీసీఐ. అయితే అనూహ్యంగా విశాఖపట్నం కుర్రాడు నితీశ్‌ కుమార్‌ రెడ్డిని మాత్రం తొలిసారి టెస్టు జట్టుకు ఎంపిక చేసింది.