భారత్ క్రికెట్ జట్టులో ఆగని విడాకులు.. ఒంటరైన మరో స్పిన్నర్

భారత క్రికెట్‌లో వరుస విడాకుల పరంపర కొనసాగుతోంది. శిఖర్‌ ధవన్‌, మహ్మద్‌ షమీ, యుజ్వేంద్ర చహల్‌, హార్దిక్‌ పాండ్యా వంటి సీనియర్ల బాటలోనే యంగ్ లెగ్ స్పిన్నర్ రాహుల్ చాహర్ కూడా తన భార్య ఇషానీ జోహర్‌తో విడాకులు తీసుకున్నట్లు ప్రకటించారు. ఇన్‌స్టాగ్రామ్‌లో ఒక భావోద్వేగపూర్వక పోస్ట్ చేస్తూ, గత 15 నెలలుగా కోర్టు ప్రక్రియలతో గడిపానని, ఈ అధ్యాయం ముగియడంతో శాంతితో కొత్త జీవితాన్ని ప్రారంభిస్తానని 26 ఏళ్ల రాహుల్ వెల్లడించారు. ఫాస్ట్ బౌలర్ దీపక్ చాహర్ సోదరుడైన రాహుల్, ఫ్యాషన్ డిజైనర్ ఇషానీని సుదీర్ఘకాలం ప్రేమించి 2022 మార్చిలో గోవాలో ఘనంగా వివాహం చేసుకున్నారు. చిన్న వయసులోనే పెళ్లి చేసుకోవడం వల్ల తనను తాను పూర్తిగా అర్థం చేసుకోలేకపోయానని, గత కొన్ని సంవత్సరాలు తనకు జీవిత పాఠాలు నేర్పాయని ఆయన పేర్కొన్నారు. కారణాలు స్పష్టంగా తెలపనప్పటికీ, ఒకప్పుడు సోషల్ మీడియాలో ఎంతో అన్యోన్యంగా కనిపించిన ఈ జంట విడిపోవడం అభిమానులను ఆశ్చర్యానికి గురిచేసింది. ప్రస్తుతం వ్యక్తిగత సమస్యల నుంచి బయటపడిన రాహుల్ చాహర్ తిరిగి క్రికెట్‌పై దృష్టి సారించనున్నారు. ఇటీవల దేశవాళీ టోర్నీల్లో ఆశించిన స్థాయిలో రాణించలేకపోయిన ఆయన, 2026 ఐపీఎల్ వేలంలో చెన్నై సూపర్ కింగ్స్ తరపున రూ. 5.2 కోట్లకు ఎంపికయ్యారు. రాబోయే ఐపీఎల్ సీజన్‌లో సత్తా చాటి, తిరిగి టీమిండియాలో చోటు సంపాదించడమే లక్ష్యంగా ఆయన సిద్ధమవుతున్నారు.