జగపతి బాబుకి మళ్లీ హీరోగా ఛాన్స్.. కానీ రిజెక్ట్ చేసిన విలన్

ఇండస్ట్రీలో ఒక్కోసారి తీసుకునే నిర్ణయాలు కెరీర్‌ను ఎలా మలుపు తిప్పుతాయనడానికి టాలీవుడ్ సీనియర్ నటుడు జగపతిబాబు ఒక అద్భుతమైన ఉదాహరణ. హీరోగా అవకాశాలు తగ్గిన సమయంలో విలన్‌గా మారాలని తీసుకున్న సాహసోపేత నిర్ణయం ఆయన కెరీర్‌ను ఊహించని మలుపు తిప్పింది. ఆ ఒక్క నిర్ణయంతో హీరోగా కంటే విలన్‌గా, క్యారెక్టర్ రోల్స్‌లో జగపతిబాబు క్రేజ్ మరింత పెరిగింది. ప్రస్తుతం ఆయన బిజీ నటుడిగా కొనసాగుతున్నారు. ఈ నేపథ్యంలో, ఆయనకున్న ప్రస్తుత క్రేజ్ చూసి మరోసారి జగపతిబాబుతో హీరోగా సినిమా చేయాలని ఓ ప్రముఖ దర్శక-నిర్మాత భావించారు. తన వద్ద ఉన్న ఒక బలమైన స్టోరీలైన్‌కు జగపతిబాబు అయితేనే పూర్తి న్యాయం జరుగుతుందని నమ్మి, ఆయనను సంప్రదించారు. విలన్ రోల్‌కి ఇస్తున్న రెమ్యూనరేషన్‌ కంటే ఎక్కువ ఇస్తామని ఆఫర్ చేశారట. కానీ.. కథ విన్న తర్వాత కూడా జగపతిబాబు తన కెరీర్‌కు సంబంధించి మరో కీలకమైన నిర్ణయాన్ని ప్రకటించారు. మరోసారి హీరోగా మారే ఆలోచన తనకు ఏమాత్రం లేదని జగపతిబాబు ఆ దర్శక-నిర్మాతకు తేల్చి చెప్పేశారు. ప్రస్తుతం విలన్‌గా, సహాయ నటుడిగా తాను ఉన్న పొజిషన్ ఎంతో సంతృప్తికరంగా ఉందని, మళ్లీ హీరోగా ప్రయత్నించి రిస్క్ చేయదలచుకోలేదని ఆయన స్పష్టం చేశారు.