టీమిండియాలోని తెలుగు క్రికెటర్లకు నోటీసులు.. ఏం తప్పు చేశారంటే?

భారత స్టార్ క్రికెటర్లు తిలక్ వర్మ, మహ్మద్ సిరాజ్‌లకు తెలంగాణ క్రికెట్ అసోసియేషన్ లీగల్ నోటీసులు జారీ చేసింది. బోర్డ్ ఆఫ్ కంట్రోల్ ఫర్ క్రికెట్ ఇన్ ఇండియా నుండి ఎలాంటి ముందస్తు అనుమతి లేకుండానే హైదరాబాదు క్రికెట్ అసోసియేషన్ నిర్వహిస్తున్న ‘TG20’ లీగ్‌కు ప్రచారం కల్పించడాన్ని తప్పుబడుతూ ఈ చర్యలు తీసుకున్నట్లు టీసీఏ జనరల్ సెక్రటరీ వెల్లడించారు. ఈ నోటీసులు కేవలం సదరు ఆటగాళ్లకు మాత్రమే కాకుండా, ఈ లీగ్ ఆపరేషన్స్ హెడ్‌గా వ్యవహరిస్తున్న మాజీ క్రికెటర్ అంబటి రాయుడితో పాటు టోర్నీ ప్రచారకర్తలుగా ఉన్న ప్రముఖ టాలీవుడ్ హీరోలు విజయ్ దేవరకొండ, వెంకటేశ్ దగ్గుబాటిలకు కూడా జారీ అయ్యాయి. బీసీసీఐ నిబంధనలకు విరుద్ధంగా, అనుమతి లేని ఒక అనధికారిక లీగ్‌కు సెలబ్రిటీ హోదాలో మద్దతు తెలపడం, ప్రచారం చేయడం చట్టవిరుద్ధమని మరియు ప్రజలను తప్పుదోవ పట్టించడమేనని టీసీఏ ఆరోపించింది. హెచ్‌సీఏ ఆధ్వర్యంలో టీ20 తరహాలో రూపొందించిన ఈ ‘TG20’ లీగ్‌లో హైదరాబాద్, రంగారెడ్డి, వరంగల్, మెదక్, నల్గొండ, కరీంనగర్, మహబూబ్‌నగర్, ఖమ్మం వంటి తెలంగాణ ప్రాంతాల పేర్లతో మొత్తం 8 జట్లను బరిలోకి దించారు. ఈ టోర్నమెంట్ జూన్ 20 నుంచి ప్రారంభమై, జూలై 11న జరిగే ఫైనల్ మ్యాచ్‌తో ముగిసేలా షెడ్యూల్ చేశారు. అయితే బీసీసీఐ ఆమోదం లేని కారణంగా ఈ లీగ్‌కు దూరంగా ఉండాలని, లేనిపక్షంలో సివిల్ కోర్టుల ద్వారా తదుపరి చట్టపరమైన చర్యలు తీసుకుంటామని టీసీఏ హెచ్చరించింది.