గ్రౌండ్‌లో శ్రీలంక ప్లేయర్ ఛాలెంజ్.. సెంచరీ బాది భారత క్రికెటర్ సమాధానం

శ్రీలంకతో జరుగుతున్న రెండో టెస్టులో భారత యువ బ్యాటర్ ధ్రువ్ జురెల్ అద్భుత శతకంతో మెరిశాడు. 99 నుంచి వంద పరుగుల మార్క్ అందుకోవడానికి 22 బంతులు ఎదుర్కొని కాస్త ఓపికగా ఆడినప్పటికీ, సెంచరీ సాధించిన క్షణం మర్చిపోలేని అనుభూతిని ఇచ్చిందని తెలిపాడు. శతకం సాధించాక కండల ప్రదర్శనతో వేడుకలు చేసుకోవడంపై క్లారిటీ ఇచ్చిన జురెల్, తన ఈ ఇన్నింగ్స్ వెనుక లంక వికెట్ కీపర్ నిరోషన్ డిక్వెల్లా విసిరిన సవాల్ కూడా ఒక కారణమని వెల్లడించాడు. క్రీజులోకి వచ్చిన వెంటనే డిక్వెల్లా తన దగ్గరకు వచ్చి, "నీకు దమ్ముంటే ఇక్కడ సెంచరీ చేసి చూపించు.. కానీ అది నీవల్ల కాదు" అని స్లెడ్జింగ్ చేశాడని జురెల్ పేర్కొన్నాడు. అయితే ఆ సమయంలో నోటితో కాకుండా బ్యాట్‌తోనే జవాబివ్వాలని నిర్ణయించుకుని, ఎంతో నిగ్రహంతో ఆడి అజేయ శతకాన్ని పూర్తి చేసినట్లు చెప్పాడు. ఆ తర్వాత డిక్వెల్లా వద్దకు వెళ్లి "నువ్వు అడిగింది చేసి చూపించా.. ఇప్పుడు నువ్వేం అంటావు?" అని ప్రశ్నించగా, అతని నుంచి ఎలాంటి సమాధానం రాలేదని జురెల్ నవ్వుతూ పంచుకున్నాడు.   మ్యాచ్ విశేషాలకొస్తే, కొలంబోలో జరుగుతున్న ఈ రెండో టెస్టుపై టీమిండియా పూర్తి ఆధిక్యం సాధించింది. దేవ్‌దత్ పడిక్కల్ (117), ధ్రువ్ జురెల్ (115 నాటౌట్)ల శతకాలతో పాటు గిల్, పంత్‌లు అర్ధశతకాలతో రాణించడంతో భారత్ తన తొలి ఇన్నింగ్స్‌ను 503/9 వద్ద డిక్లేర్ చేసింది. అనంతరం బ్యాటింగ్‌కు దిగిన శ్రీలంక, రెండో రోజు ఆట ముగిసే సమయానికి 8 పరుగులకే 2 వికెట్లు కోల్పోయి తీవ్ర కష్టాల్లో పడింది. లంక జట్టు భారత్ కంటే ఇంకా 495 పరుగులు వెనుకబడి ఉంది