టీ20 ప్రపంచకప్‌ భారత్ బోణీ.. పాక్‌ను చిత్తుగా ఓడించి రివేంజ్

మహిళల టీ20 ప్రపంచకప్‌లో భారత జట్టు ఆల్‌రౌండ్‌ ఆధిపత్యంతో చిరకాల ప్రత్యర్థి పాకిస్థాన్‌పై 64 పరుగుల తేడాతో ఘనవిజయం సాధించింది. బర్మింగ్‌హామ్‌లో జరిగిన గ్రూప్‌-1 మ్యాచ్‌లో టాస్‌ గెలిచి మొదట బ్యాటింగ్‌ ఎంచుకున్న భారత్‌ నిర్ణీత ఓవర్లలో 6 వికెట్లకు 170 పరుగుల భారీ స్కోరు చేసింది. ఆరంభంలోనే షెఫాలి (6), జెమీమా (1) వికెట్లు కోల్పోయి కష్టాల్లో పడిన జట్టును ఓపెనర్ స్మృతి మంధాన (68; 44 బంతుల్లో 9×4, 2×6) అద్భుత ఇన్నింగ్స్‌తో ఆదుకోగా, కెప్టెన్ హర్మన్‌ప్రీత్ కౌర్ (36) చక్కని సహకారం అందించింది. ఆఖర్లో వికెట్‌కీపర్ బ్యాటర్ రిచా ఘోష్‌ (34; 17 బంతుల్లో 5×4, 1×6) మెరుపు ఇన్నింగ్స్ ఆడటంతో చివరి రెండు ఓవర్లలోనే ఏకంగా 38 పరుగులొచ్చి భారత్ మెరుగైన స్కోరు సాధించింది.

171 పరుగుల లక్ష్య ఛేదనలో పాకిస్థాన్ జట్టు భారత బౌలర్ల ధాటికి 17 ఓవర్లలో కేవలం 106 పరుగులకే కుప్పకూలింది. ఓపెనర్ మునీబా అలీ (41) మినహా పాక్ బ్యాటర్లలో ఎవరూ పెద్దగా రాణించలేకపోయారు. ఒక దశలో 4 ఓవర్లలో 37/0తో బలంగా కనిపించిన పాక్‌ను భారత స్పిన్నర్లు పూర్తిగా ఉక్కిరిబిక్కిరి చేశారు. ముఖ్యంగా దీప్తి శర్మ తన స్పిన్‌ మాయాజాలంతో ఐదు వికెట్లు పడగొట్టి పాక్ నడుం విరచగా, శ్రీచరణి మూడు వికెట్లతో రాణించింది. చివరి 7 వికెట్లను పాక్ కేవలం 31 పరుగుల వ్యవధిలోనే కోల్పోవడం గమనార్హం.

రాజకీయ, సరిహద్దు ఉద్రిక్తతల నేపథ్యంలో ఈ మ్యాచ్ ముగిసిన తర్వాత కూడా భారత్, పాక్ క్రికెటర్లు మైదానంలో కరచాలనం చేసుకోలేదు. ప్రపంచకప్‌లో ఘనమైన బోణీ కొట్టిన హర్మన్‌ప్రీత్ సేన, బుధవారం జరగబోయే తమ తదుపరి మ్యాచ్‌లో నెదర్లాండ్స్‌తో తలపడనుంది.